Изложение САКЪЛАНМАГЪАН СЫНАМ. Изл. 9 карач яз. 2019 сакъланмагъан сынам
 Скачать 31 Kb.
|
|
Изл. – 9- карач.яз. 2019 САКЪЛАНМАГЪАН СЫНАМ Гокка, буйрукъну эшитмегенча, орундукъгъа миниб, къабыргъада Сталинни суратын алыб, чемоданнга сала: «Сталинни бу бизге тюшген къыйынлыкъдан хапары болмагъаны хакъды, джауну ишиди бу», - деб кёлюне келди. Мажай бла Хабибат, бири бирине къысылыб олтурадыла. Гокка аланы къатларына баргъанында, ала: «Биз джукъгъа да чыгъарыкъ тюлбюз, бизни былайда урсунла да къойсунла, атабыз, анабыз джатхан джуртну атыб къайры барлыкъбыз!» - дей, бири бирине бютюн да къысылдыла. Гокка, не айтыргъа, не этерге да билмей, сын болду. Кеси да, алагъа къошулуб, шкокну бурнуна кёкюрегин салырчады. «Къобугъуз ёрге, итле! Сизни юсюгюзге сюелиб неллай бирни турлукъма мен?! Сизден сора да бардыла бандитле! Къобугъуз бусагъат!» - деб, лейтенант къартлагъа автоматны бурду. Гокка, атасы бла анасыны алларында чёгелеб: «Къобугъуз, джанларым, къобугъуз. Бу зорлукъ былай къаллыкъ тюлдю, орта айырылгъынчы не дей эселе да тёзерге кюреширикбиз. Не зат эсе да джангылыч ишди…» - деб тиледи. Атасы: «Ёлген къыйын тюлдю, къызчыкъны уа, кёзюбюз кёре тургъанлай, кесин ийиб къалай къояйыкъ» - деб, акъырын ёрге къобду. «Мен къайры барайым, аякъ юсюме сюелалмагъанлай? - деб Мажай бой берди. «Кёлтюрюб элтирбиз» - деб, Гокка атасын кийиндириб тебреди. Эки тиширыу да кючден-бутдан кёлтюрюб, эшик таба айландыла. «Элт, къайры элтирик эсенг да!» - деб, лейтенант, бу джол демлешиб кюрешмей, алда тебреди. Бирси солдат а, автоматына къадалыб, келгенли бери да эшикни сакълайды. Къара кече басыб тургъан арбазгъа чыкъгъанларында, тёрт джанында къычырыкъ-хахай, джылау-сыйыт, арба чарх таууш, ит юрген ёзенни толтургъанча алай эди. Бу къыяматны барын таула, эниклеб, артыкъ да ачы этедиле. Таула, бир тукъум бир тюрлю къабха киргенча, къараладыла. Мажайланы самыр, асыры бек чабхандан, хырха болгъанды. Арбаздан чыкъгъанлай, джолда арба сакълаб тура эди. Хабибат бла Гокка, Мажайны кючден-бутдан анга олтуртуб, хапчюклеге къайтдыла. Боташланы Мажайны кёбню кёрген, кёбню сынагъан юйюню эшиклери кенгине керилиб къалдыла. Патеген лампаны мутхуз джарыгъы терезелени аз-буз джарытханлай къалды. (282 сёз) (Байрамукъланы Халиматдан) Творчестволукъ иш: джазгъан хапарлауугъузгъа кесигизни оюмугъузну къоша барыгъыз |