Тиль дерслери Дерс конспекти
 Скачать 33.43 Kb.
|
|
Тиль дерслери: 1.Дерс конспекти. 7-В сыныф Кечирильген куню: 14.10.2021с. Дерснинъ мевзусы: «Бельгисизлик ве ёкълукъ замирлери» Дерснинъ макъсадлары: 1. Талебелернинъ озьлюк ве мулькиет замирлери акъкъында бильгилерини тешкермек, текрарламакъ. 2. Бельгисизлик ве ёкълукъ замирлери мевзусынен багълы янъы малюмат бермек ве пекитмек. 3. Талебелернинъ агъзавий ве язма нутукъларыны зенгинлештирмек, инкишаф этмек. Марифет УОА (познавательные УДД): Бельгисизлик ве ёкълукъ замирлери мевзусынен багълы янъы малюмат бермек ве пекитмек. Шахсиет УОА (личностные УДД): окъувгъа меракъ, эдебиятымызгъа севги ашламакъ, бильги чокърагына якъынлаштырмакъ, иджаткярлыкъ ишине ихтиядж догъурмакъ, талебелерни бильгиге авеслендирмек. Коммуникатив УОА (коммуникативные УДД): Къыйын вазиетлерни мустакъиль чезюв. Озюни ве бир-бирини тешкерюв. Регулятив УОА (регулятивные УДД): Дёнеме ишлер беджерилюви. Фикирлерни козетюв эсасында сёйлеви. Дерснинъ мевзу ве меселесини ифаде этмек. Дерс теминаты: дерслик, даркъатма материал, джедвель. Окъутув шекиллери (формы обучения): группада окъутув. Окъутув усуллары (методы обучения): сёз усулы, амелий усул, китапне чалышув. Планлаштырылгъан тасиль нетиджелери (планируемые образовательные результаты): Предмет нетиджелери: бельгисизлик ве ёкълукъ замирлер акъкъында малюмат бермек. Метапредмет нетиджелери: дерсте берильген малюматнен къулланмакъ, беджерген ишлернинъ нетиджесини чыкъара бильмек; Шахсий нетиджелер: бильги алув фааллигини инкишаф тмек, огренген ве эшиткен бильгилерине ахлякъий къыймет кесмеге, огренилеяткъан малюматларгъа джанлы меракъ уятмагъа бильмек. Дерснинъ кетишаты: 1.Тешкилий къысым. Селямлашув: – Селям алейкум, талебелер. – Алейкум селям. – Оджанынъ сёзю: Эр кес топлангъанына коре келинъиз ким кельгенини къайд этейик (ёкълама япылы (2 дакъикъа)). 2.Эв вазифесини тешкирюв. Оджанынъ сёзю: – Замир деп неге айтамыз? Талебенинъ сёзю: – Предметке, аляметке я да микъдаргъа догърудан-догъру ад олмайып, лякин бир де бир усулнен шу предметни, аляметни я да микъдарны бильдирген сёзлерге замир дейлер. Оджанынъ сёзю: – Замирлер насыл сёз чешити ерине къулланылалар? Талебенинъ сёзю: – Замирлер исим, сыфат, сайы ерине къулланылалар. Оджанынъ сёзю: – Замирлернинъ къач ве насыл чешитлери айырыла? Талебенинъ сёзю: – Замирлер, грамматик ве мана аляметлерине коре, секиз группагъа болюнелер: шахыс замирлери, ишарет замирлери, суаль замирлери, айрыджы-умумлештириджи замирлери, озьлюк замирлери, бельгисизлик замирлери, ёкълукъ замирлери, мулькиет замирлери. Озьлюк ве мулькиет замири. 1.Озьлюк замири нении ифаделей? 2.Озьлюк замири насыл джумле азасы вазифесини беджерир? 3.Мулькиет замирлери неге аитликни , менсюпликни ифаделейлер? 2.Талебелерге карточка вастасынен вазифе бериле. А. Озьлюк замирлерини къулланып, джумлелер тизиньиз. Б. Мулькиет замирлерни къулланып, джумлелер тизиньиз. Лугъат иши: Бельгисизлик замири – неопределенные местоимения ёкълукъ замири – отрицательные местоимеия вазиет – состояние, положение алямет – признак мана – значение мевджут – имеющийся малюм – известный ялгъама – аффикс мустакъиль – самостоятельный эсасен – в основном. 4. Янъы мевзу огренюв. Оджанынъ сёзю : – Бугунь биз сизлернен бельгисизлик ве ёкълукъ замирлернен таныш оладжамыз. Дефтерлеринъизни ачынъыз ве бугуньки кунюни ве мевзуны тахтадан язып алынъыз. Бельгисизлик замирлери малюм олмагъан предметни, аляметни анълаталар. Башкъа замирлернинъ манасы контекстте анълашыла, амма бельгисизлик замирнинъ манасы контекстте де ачылмайып къала. Бельгисизлик замирлер, эсасен, суаль замирлерине –дыр, -дир ялгъамалары къошулувынен (кимдир, недир, къайсыдыр, насылдыр киби), суаль замирлерине ве шей сёзюнинъ огюне бир сайысыны къоювнен (бир ким, бир къач, бир шей) япылалар. Бир сёзю базы ве къайсы сёзлеринден сонъ кельгенде де бельгисизлик манасыны ифаделей: базы бир (талебелер), къайсы бир (адам) киби. Ёкълукъ замирлери мевджут олмагъан предмет, алямет я да микъдарны умумийлештирип косьтерелер. Ёкълукъ замирлери суаль замири я да бир, шей сёзлери огюне ич сёзюни къоювнен япыла: ич ким (ич кимсе), ич бир (ич бири), ич бир ким (ич бир кимсе), ич бир шей киби. Эвристик субет усулындан файдаланып, талебелер оджанынъ ярдымынен ашагъыдаки меселелер боюнджа къаидени менимсейлер. 1.Бельгисизлик замирлернинъ анълаткъан манасы. 2.Бельгисизлик замирлернинъ япылувы. 3.Ёкълукъ замирлери нени умумийлештирип косьтергени акъкъында. 3)Оджанынъ беяны усулындан файдаланып, бельгисизлик ве ёкълукъ замирлери акъкъында малюмат изатлана. Бельгисизлик ве ёкълукъ замирлерининъ япылувы.. Келинъиз энди тахтада берабер чалышайыкъ. Талебелернен берабер тахтада вазифе беджериле. Мустакъиль иш: китаптан мешгъулиет беджериле. Мешгъулиетни берабер тешкерюв. 5. Янъы мевзуны пекитюв. Вазифе 1. Балалар шимди сиз манъа ёкълукъ замирлеринен джумлелерни тизинъиз, сонъ бельгисизлик замирлеринен джумле тизинъиз. (Бельсизлик замирлеринен джумле: 1.Кимдир эвимизге кельди! 2.О бугунь биршей япмады. Ёкълукъ замирлеринен джумле: 1.Ич кимсе эв ишини азырламады. 2. Ич бир шей менден сорама, лютфен! Оджанынъ сёзю: МашАллах баллар! Вазифе 2. 1) Эки талебеге вазифе берилле: Ашагъыдаки вазиетке эсасланып, субет (диалог) тизинъиз: «Тарих дерсинде». Бир талебе – тарих оджасы. Экинджиси – 7-нджи сыныф талебеси. (–Селям Алейкум, оджам! – Алейкум Селям, Рефат! Айтчи манъа, не ичюн ич кимсе эв ишинъи азырламады? – Оджам, багъышланъыз, амма бир къач талебе эв ишинъи азырлады! – Яхшы, ойле олса, кимдир олар, сойле! – Мен, Рефат, Роза ве Амина! – Я къалгъанлары не ичюн ич бир шейни япмады? – Чюнки олар базы бир вазифелерни анъламадылар!....) 2) Карточкада ашагъыдаки вазифе беджериле. Берильген замирлернен джумлелер тизинъиз. А. Кимдир, къайсыдыр, бир ким. (Кимдир мусафирликке кельди. О джедвельде къайсыдыр?) Б. Ич ким (ич кимсе), ич бир ким (се). (Ич кимсе даа ашамады.) 3) Китапнен чалышув. Мешгъулиетлер 6. Пекитюв. Оджанынъ сёзю: – Биз сизлернен насыл сёз чешитини кечемиз? Талебелер: – Биз шимди замир сёз чешитини кечемиз. Оджанынъ сёзю: –Замир деп неге айтамыз? Талебенинъ сёзю: – Предметке, аляметке я да микъдаргъа догърудан-догъру ад олмайып, лякин бир де бир усулнен шу предметни, аляметни я да микъдарны бильдирген сёзлерге замир дейлер. Оджанынъ сёзю: – Замирлернинъ къач ве насыл чешитлери айырыла? Талебенинъ сёзю: – Замирлер, грамматик ве мана аляметлерине коре, секиз группагъа болюнелер: шахыс замирлери, ишарет замирлери, суаль замирлери, айрыджы-умумлештириджи замирлери, озьлюк замирлери, бельгисизлик замирлери, ёкълукъ замирлери, мулькиет замирлери. Оджанынъ сёзю: – Биз бугунь насыл чешитлерини огрендик? Талебенинъ сёзю: – Биз бугунь бельгисизлик замирлернен ве ёкълукъ замирлеринен таныш олдыкъ. Оджанынъ сёзю: – Насыл замирлерге бельгисизлк замири деймиз, мисаль кетиринъиз. Талебенинъ сёзю: – Бельгисизлик замирлери малюм олмагъан предметни, аляметни анълаталар. Мисаллаер: кимдир, недир, къайсыдыр, насылдыр, бир ким, бир къач, бир шей. Оджанынъ сёзю: – Насыл замирлерге ёкълукъ замири деймиз, мисаль кетиринъиз. Талебенинъ сёзю: – Ёкълукъ замирлери мевджут олмагъан предмет, алямет я да микъдарны умумийлештирип косьтерелер. Мисаллер: ич ким (ич кимсе), ич бир (ич бири), ич бир ким (ич бир кимсе), ич бир шей. 7. Дерсни умумийлештирюв ве нетиджелев. 1.Бильгисзлик замирлери насыл предметни, аляметини анълаталар? (Бельгисизлик замирлери малюм олмагъан предметни, аляметни анълаталар.) 2.Бильгисизлик замирлери насыл япылалар? (Бельгисизлик замирлер, эсасен, суаль замирлерине –дыр, -дир ялгъамалары къошулувынен (кимдир, недир, къайсыдыр, насылдыр киби), суаль замирлерине ве шей сёзюнинъ огюне бир сайысыны къоювнен (бир ким, бир къач, бир шей) япылалар.) 3.Ёкълукъ замирлери нении умумийлештирип косьтерелер? (Ёкълукъ замирлери мевджут олмагъан предмет, алямет я да микъдарны умумийлештирип косьтерелер.) 4.Ёкълукъ замирлери насыл япылалар? (Ёкълукъ замирлери суаль замири я да бир, шей сёзлери огюне ич сёзюни къоювнен япыла.) 8. Баалав. Оджа тарафтан, дерсте ишлеген талебелер ичюн баалав. Эвге вазифе: 1. Янъы мевзуны яхшы этип огренмек. 2. Къаиделерни эзберлемек. 3. Бельгисизлик ве ёкълукъ замирлеринен учер джумле тизмек ве дефтерге язмакъ. |