Семянькова. Стылістыка і КБМ. А. М. Багамолава, Г. К. Семянькова
 Скачать 1.76 Mb.
|
|
Аповесць – апавядальны мастацкі твор, у якім з дапамогай шэрагу эпізодаў, больш ці менш разгорнутых апісанняў, выяўляецца сутнасць нейкай падзеі, абмалёўваецца станаўленне характару адной ці некалькіх дзейных асоб у іх развіцці. Верш – невялікі па аб’ёме, завершаны па думцы і форме твор, напісаны вершаванай мовай; у ім знаходзяць адлюстраванне з’явы і падзеі рознага характару (драматычныя, трагічныя, камічныя і г.д.), выяўляюцца адносіны аўтара да гэтых падзей. Вылучаюцца вершы філасофска-медытатыўныя (медытацыя, пасланне, стансы, ямбы, філасофскі верш, элегія), велічальныя (ода, дыфірамб, панегірык, апалог, мадрыгал, гімн, эпітафія, рацэя, эпіграма), песенныя (раманс, песня, серэнада, марш, псалом, кантата і інш.) і г.д. Драма – твор, у аснове якога востры канфлікт, што не заканчваецца трагічнай развязкай. Камедыя – гумарыстычна-сатырычная п’еса, у якой паказваюцца камічныя падзеі і з’явы, высмейваецца негатыўнае ў жыцці. Паэма – буйны вершаваны твор, у якім важныя праблемы рэчаіснасці раскрываюцца эпічнымі (наяўнасць у творы сюжэта, персанажаў) і лірычнымі (вобраз лірычнага героя, шматлікія лірычныя адступленні) сродкамі. Раман – твор, у якім шырока ахоплены істотныя жыццёвыя з’явы пэўнага сацыяльнага асяроддзя, нацыі і эпохі, паказаны шматлікія характары ў іх развіцці, псіхалагічнай напоўненасці, створаны разнастайныя бытавыя малюнкі. Трагедыя – адзін з відаў драмы, заснаваны на непрымірымым, трагічным канфлікце паміж моцнай высакароднай асобай і абставінамі, якія не даюць магчымасці ажыццявіць яе мары. Мова мастацкай літаратуры, нягледзячы на стылявую неаднастайнасць і шырокае праяўленне аўтарскай індывідуальнасці, валодае шэрагам спецыфічных рыс, якія дазваляюць адрозніць стыль мастацкай літаратуры ад іншых функцыянальных стыляў. Лексічныя асаблівасці мастацкага стылю:
а) дыялектызмы ў творах пісьменнікаў старэйшага пакалення, напрыклад, пачатку ХХ стагоддзя, выконваюць намінатыўную функцыю: Гаспадар разгаманіўся, нават лішне стаў зюклівы ‘гаваркі’ (М. Гарэцкі). У мове ж мастацкай літаратуры і публіцыстыкі, пачынаючы з 40-х гг. ХХ ст., тэрытарыяльна абмежаваныя словы выкарыстоўваюцца са стылістычнай мэтай – як сродак замалёўкі побыту жыхароў пэўнай мясцовасці, стварэння этнаграфічнага каларыту, а таксама як сродак індывідуалізацыі мовы персанажаў: Загаварылася я. Вячэру ж трэба ісці строіць ‘гатаваць’ (І. Пташнікаў); б) жарганізмы з’яўляюцца яркім стылістычным сродкам характарыстыкі людзей пэўных сацыяльных груп: “Жытуху” стварылі сабе тарбахваты (Н. Гілевіч); в) спецыяльная лексіка (тэрміны і прафесіяналізмы) – стылістычны сродак адлюстравання рэчаіснасці, стварэння прафесійнай атмасферы, апісання персанажа праз яго мову: Праўда, меў спраўную рыбацкую гаспадарку: два чаўны і розныя там сеткі, мярэжы, бучы, перамёты і шмат іншага, чаму Мікола і назвы не ведаў [сеткі, мярэжы, бучы, перамёты – прылады для лоўлі рыбы] (М. Машара); г) устарэлая лексіка (архаізмы і гістарызмы) у творах пісьменнікаў ранейшага пакалення выконвае намінатыўную функцыю: у час напісання твораў гэтыя словы актыўна ўжываліся для называння прадметаў і з’яў: Я буду маліцца да нівы ўсёй сілаю, каб лепшаю ўродай [ураджаем] плаціла за труд (Я. Купала). У мове тэкстаў сучасных аўтараў устарэлая лексіка выконвае стылістычную ролю – стылізуе мову персанажаў, стварае каларыт мінулай эпохі: Як і ўсе, браў князь у рукі адмысловы тупы меч, страляў з лука, кідаў у дубовага, глыбока ўкапанага ў зямлю балвана цяжкую дзіду, цэлячы то ў голаў, то ў грудзі, і не бачыў, але адчуваў ухвальныя позіркі Віславуса і ваяроў(У. Арлоў). У творах на сучасную тэматыку архаізмы і гістарызмы выкарыстоўваюцца таксама для надання апісанай з’яве ці падзеі адцення іроніі, камічнасці, часам – урачыстасці, узнёсласці: Ствараю дзіўнай прыгажосці перлы, На дне якіх заснуў нясцерпны боль, Мая жывая і мая памерлая, Крыніца шчасця, мук маіх юдоль. (У. Караткевіч) [перл – устар. тое, што і жэмчуг; перан. пра што-небудзь выдатнае, цудоўнае (высок. і іран.); юдоль – устар. 1. даліна, лог; 2. месца, дзе пакутуюць, плачуць]; д) неалагізмы (у першую чаргу індывідуальна-аўтарскія) – яркі эмацыянальна-экспрэсіўны сродак з незвычайным, свежым значэннем: Божа, я ўжо былых не ўзнаўлю Яснадум, яснадзён, ясназорак(Н. Гілевіч).Неалагізмы ўжываюцца і для дасягнення мастацкіх эфектаў, для гульні слоў; е) экзатызмы і варварызмы выконваюць у мастацкіх творах стылістычную функцыю – ствараюць каларыт пэўнай дзяржавы, народа, характарызуюць персанажы, з’яўляюцца сродкам стварэння гумару і сатыры: Я апрануўся, сеў на нарты, і каюр – паганяты запрэжкі – пагнаў сабак [нарты ‘вузкія, доўгія сані ў народаў Поўначы для язды на сабаках або аленях’] (Я. Брыль). Лексіка-семантычная структура мовы мастацкага стылю залежыць ад ідэйна-эмацыянальнага зместу канкрэтнага твора, ад задач, што вырашаюцца ў ім, ад пэўнай сітуацыі, якая апісваецца. Таму тут выкарыстоўваюцца словы як стылістычна нейтральныя, так і функцыянальна афарбаваныя (з размоўнай ці кніжнай афарбоўкай). Так, у творах, дзе апавядаецца пра пэўную галіну вытворчасці, навукі, культуры і пра людзей, занятых у гэтай галіне, будзе шмат прафесіяналізмаў, тэрмінаў. Пры апісанні пейзажаў дамінуюць словы, што называюць з’явы прыроды, іх прыметы. Калі мы чытаем твор пра вясковае жыццё, то нярэдка сустракаем назвы прадметаў сялянскага побыту, а таксама дыялектную лексіку і г.д. Марфалагічныя і граматычныя асаблівасці мастацкага стылю наступныя: 1) насычанасць тэксту дзеясловамі, што робіць яго дынамічным (афіцыйна-справавому і навуковаму стылям уласціва статыка): Потым, зразумела, узнімецца вецер, паабтрасе светлыя кроплі-пацеркі, што вось зараз качаюцца на лістах, і яны, буйныя і цяжкія, пазашпокаюць, нібы пераспелыя лясоўкі, па кустах, па траве, па зямлі… (Я. Сіпакоў); 2) ужыванне ўсіх асабовых займеннікаў, якія замяняюць назоўнік любога разраду, а не толькі абстрактнае паняцце, як у навуковым стылі: Усюды чакалі дажджу. І ён недзе пад абед, нарэшце, зашумеў (Я. Сіпакоў); Сцяблінка – тонкая, кволая, танчэйшая за жытнюю – аж дзівішся, як яна трымае такія шырокія лісты! (І. Мележ); 3) выкарыстанне ўсіх формаў асабовых дзеясловаў (у тым ліку 1-й і 2-й асобы, якія не ўласцівы для навуковага і афіцыйна-справавога стыляў): Я запрашаю цябе ў свой рай! Прылятай да мяне, прылятай!; Дазволь! Я яшчэ за цябе памалюся У цішы сваёй светлай радасці. І ў выспелай скрушнай скрусе Я яшчэ за цябе памалюся… (А. Багамолава); 4) формы слоў з суфіксамі суб’ектыўнай ацэнкі, якія не толькі ўплываюць на семантыку слова, але і надаюць дадатковае сэнсавае адценне лакальнасці, пяшчоты, шкадавання, зневажальнасці, іранічнасці і інш.: Ну і дзіўны Гэты вожык – Не відаць Ягоных ножак. Не відаць Ягоных вочак – Ну, не вожык, А клубочак(П. Марціновіч); 5) выкарыстанне формаў клічнага склону назоўніка, якія заўсёды з’яўляюцца стылістычна афарбаванымі, бо выражаюць пяшчоту, любасць, узвышанасць, часам архаічнасць: Гуслям, княжа, не пішуць законаў (Я. Купала); Паклон табе, мой беларускі краю! (Н. Гілевіч); 6) ужыванне ў вершаваных творах інфінітываў на -ці, якія з’яўляюцца паэтычным сродкам: Ой, хацела ж мяне маці Ды за трэцяга аддаці. А той трэці – Як у полі вецер. Сінтаксічныя асаблівасці: У мастацкім стылі выкарыстоўваецца ўсё багацце сінтаксісу беларускай мовы: простыя і складаныя сказы, сказы з апавядальнай, пытальнай, клічнай і пабуджальнай інтанацыяй, аднародныя члены сказа, звароткі, экспрэсіўнае вылучэнне членаў сказа (сегментацыя, далучэнне, парцэляцыя і інш.). Выбар пэўнага тыпу сказа прадыктаваны кантэкстам, сітуацыяй, асаблівасцямі стылю аўтара. Так, дыялогам уласцівы няпоўныя сказы, сказы з умоўчаннем – спецыяльна незакончаныя канструкцыі для ўзмацнення экспрэсіі. Безасабовыя сказы, якія абазначаюць дзеянні і працэсы, што адбываюцца нібы самі па сабе, ужываюцца пры апісанні з’яў прыроды, псіхічнага або фізічнага стану чалавека. З дапамогай намінатыўных сказаў ствараюцца малюнкі прыроды, апісваюцца побыт, прадметы, з’явы, якія ўспрымаюцца наглядна, як існуючыя ў дадзены момант: Ноч. Халодная зямлянка. Перастрэлка. Цішыня(П. Глебка). Пытальныя, пабуджальныя і клічныя сказы – экспрэсіўна-стылістычныя сродкі мовы, бо выражаюць эмоцыі чалавека: захапленне, радасць, смутак, шкадаванне, абурэнне, здзіўленне і інш. Інверсія надае выказванню дадатковыя сэнсавыя і экспрэсіўныя адценні: найбольшы акцэнт прыпадае на той член сказа, які стаіць у канцы ці ў пачатку канструкцыі. Складаныя сказы шырока ўжываюцца пры стварэнні пейзажных замалёвак, апісанні знешняга выгляду персанажаў, пры перадачы думак і разважанняў аўтараў ці дзейных асоб. Сродкі стварэння выразнасці: 1) сінонімы, якія дазваляюць пазбегнуць паўтораў, дапамагаюць найбольш поўна, усебакова апісаць прадметы і з’явы: Прабегшы некалькі хат, Арцём звярнуў на агароды, шуснуў у каноплі, адтуль разораю між капусты забег у надворак Юркі Труса, з надворку заламаў у вулачку і пасучыў проста да калодзежа (Я. Колас); 2) амонімы (амографы, амафоны, амаформы) з’яўляюцца сродкам стварэння каламбураў, выразнай рыфмы: Я на елку палячу – Усе галінкі палячу: Дзюба ў мяне доўгая, Буду стукаць доўга я. Назіраю я тады, Як буяюць ягады: З журавін зрабіў каралі – Журавы мяне каралі, Што не ўсе яны паспелі, А дразды скляваць паспелі. (Загадка. Адгадка: дзяцел; С. Грахоўскі); 3) антонімы: Шчасце ходзіць толькі ў пары з горам (Н. Гілевіч). Антонімы таксама ляжаць у аснове антытэзы – стылістычнага прыёма, заснаванага на супастаўленні процілеглых з’яў, прадметаў, характараў, пачуццяў, ідэй, вобразаў (Мы – кансерватары ўсе Тупаватыя. Вы – завадатары бур і наватары. Мы ўсе – аўральнікі, Культу стваральнікі, Вы –праўдалюбы, Хлусні выкрывальнікі…(П. Панчанка); Слову жывому – на глебу ўрадлівую, Мёртваму слову – на камень, на жвір. Шчыраму сэрцу – долюшчаслівую, Чэрстваму сэрцу – балота і вір(С. Дзяргай) і аксюмарана – спалучэння супрацьлеглых разуменняў, якія лагічна выключаюць адно другое, але ўжытыя разам даюць новае паэтычнае ўяўленне (разумны дурань, жывы труп, звонкая цішыня і г.д.): Ці доўга было гэта? Можа, хвіліна, Можа, паўвека, а можа, больш… Але пакінула ты, дзяўчына, Смутную радасць і светлы боль (М. Лужанін); 4) алітарацыя – паўтарэнне аднолькавых або падобных зычных гукаў, прадвызначанае пэўнымі мастацкімі задачамі: Дзе возера пад сонцам млее І, як стамлёны матылёк, закалыханая лілея На рукі просіцца здалёк (Г. Бураўкін); Сеецца, Сыплецца, Падае снег, Сцелючы белую коўдру – пасцель. Дрэмлюць прысады ў задумлівым сне, Снежную ловячы голлем шрапнель (Н. Гілевіч); Пустыя жорны роспачы палын, Тугу і крыўду, стогнучы, малолі (У. Някляеў), асананс – паўтарэнне аднолькавых або падобных галосных гукаў: На возеры лодкі-маторкі І вёсел вясёлы ўсплёс; Усміхнуліся першыя зоркі, І вечар расінкі растрос (Я. Пушча). Вобразна-выяўленчыя сродкі мовы – тропы і фігуры – надаюць выказванню эмацыянальнасць, служаць для маляўнічага адлюстравання рэчаіснасці, эстэтычнага ўздзеяння на чытача або слухача. Тропы – словы ці моўныя выразы, ужытыя ў пераносным значэнні. Да асноўных тропаў адносяцца: 1) метафара – перанос назвы з аднаго прадмета на другі на аснове падабенства: Страсаесветлякоў цыгаркі на росы прыцемак-хвалько (Р. Барадулін); Сонца ці то спала, ці то блукала ў высокіх шэрых хмарах (А. Багамолава); 2) метанімія – перанос назвы з аднаго прадмета на другі на аснове сумежнасці: Мінск едзе па грыбы (П. Панчанка); 3) сінекдаха – перанос назвы з аднаго прадмета на другі на аснове колькасных суадносін: А ў жытнёвае лета вісіць над зямлёй яблык, пераспелы і светлы, як даўняя журба; ён упадзе – і надыдзе восень… (М. Стральцоў); 4) перыфраза – вобразны выраз, які апісальна называе і характарызуе з’яву, прадмет, дзеянне: Яблынька для занесенага аднекуль зернейка клёна як маці: яна аберагае ад сцюжы і вятроў узімку, прыкрывае галінкамі ад халодных дажджоў увосень, жывіць уласным сокам карэнне прыёмнага сына ў час вясны; Дзённік мой – мае далоні, мазалі – мае адзнакі(В. Шніп);
Ільняная і жытнёвая, сялянская, Баравая ў казачнай красе, Старажытнейшая, Самая славянская, Светлая, як травы ў расе, Вобразная, вольная, пявучая Мова беларуская мая. (П. Панчанка)
Стылістычныя фігуры – своеасаблівыя сінтаксічныя канструкцыі, якія маюць спецыфічную будову, чым узмацняюць эстэтычную выразнасць і эмацыянальнасць выказвання, акцэнтуюць увагу на важкім слове або выразе, дапамагаюць лепш выявіць думку аўтара, перадаць яго душэўны стан. Да асноўных стылістычных фігур адносяцца наступныя: 1) анафара – паўтарэнне аднолькавых гукаспалучэнняў, слоў ці выразаў у пачатку вершаваных радкоў або суседніх строфаў: Калі хто скажа, што ў каханні ён Усё спазнаў і вычарпаў дазвання, Не верце. Ён не знаў яшчэ кахання. Ён яшчэ трапіць да яго ў палон, І будзе плакаць над сабой былым, І пракляне ўчарашняе бяссонне, І здзівіцца, што, можа, толькі сёння Узнік кахання воблік перад ім. Калі хто скажа, што даўно ані Ужо няма ў каханні таямніцы, Не верце, і яму яшчэ прысніцца Яно, як цуд нязнанай чысціні. (Г. Бураўкін) Чужаніца Гэта чужая зямля, хоць часам мне сняцца дзіўныя сны пра яе. Гэта чужая зямля, хоць птушкі пяюць тут, як птушкі маёй радзімы, і язмінавы куст пахне, як язмін маёй радзімы, і стары асвер рыпіць, як асвер маёй радзімы. Гэта чужая зямля, бо з вуснаў яе людзей злятаюць чужыя словы, якія не могуць сагрэць мае душы. Гэта чужая зямля, хоць у ёй ляжаць мой бацька, мой дзед і мой прадзед. Гэта чужая зямля, і мяжа паміж ёй і радзімаю пралягае не ў прасторы, а ў часе. Гэта чужая зямля, але ўсё гучней чуваць голас суцяшэння: ляжаш побач з продкамі, і яна стане радзімаю. (У. Арлоў) 2) эпіфара – паўтарэнне аднолькавых гукаў, слоў ці выразаў у канцы вершаваных радкоў або строфаў: Падыходзяць да парога, Углядаюцца без слоў, Запрашаюць у дарогу Бог, Радзіма і Любоў. Каб, не здзейсніўшы, не згінуць, Не карміць чужых бажкоў, Хай жывуць у кожным сэрцы Бог, Радзіма і Любоў. (Л. Сіманёнак) 3) кальцо страфы – паўтарэнне ў пачатку і ў канцы асобных вершаваных радкоў, строфаў ці цэлага твора аднолькавых гукаспалучэнняў, слоў або выразаў: Край мой беларускі, край! Дай мне прыгарнуцца, дай! Да твайго ляснога Вераснога долу, Дзе так шчасця многа Выпала на долю, – Дай жа прыгарнуцца, дай!(Н. Гілевіч) 4) кампазіцыйны стык – паўтарэнне ў пачатку наступных радкоў або строфаў гукаспалучэнняў, слоў, словазлучэнняў, якімі заканчваюцца вершаваныя радкі або цэлыя строфы: Купалачка, дзе твая дачка? Мая дачушка ў горадзе, У горадзе лянок поле, Лянок поле, краскі шчыпле, Краскі шчыпле, вянкі ўе, Вянкі ўе, на сябе кладзе, На сябе кладзе, да шлюбу йдзе. (з песні) 5) паралелізм – паралельнае размяшчэнне аднатыпных элементаў выказвання (з’яў, вобразаў, матываў і г.д.), што супастаўляюцца паміж сабой: Хіба можна рабіць нешта добрае, калі самі злыя? Хіба можна быць святым, калі думкі нашы далёкія ад святасці? (Я. Сіпакоў); А мне яшчэ і сёння памятаюцца два выбухі. Адзін – гулкі і моцны, які аж скалануў лес. Гэта Пеця з падлеткамі знайшлі недзе снарад і ўзарвалі яго ў лесе.Другі – ціхі, ледзь чутны…Гэта немцы, пачуўшы выбух, выехалі ў лес і злавілі там Пецю(Я. Сіпакоў); Хто сказаў – вада без паху, Хто сказаў – вада без смаку? Той, відаць, не смяг у спёку і ад смагі ў суш не млеў. (Я. Сіпакоў) 6) градацыя – такое размяшчэнне слоў і выразаў, пры якім назіраецца нарастанне або аслабленне іх эмацыянальна-сэнсавай нагрузкі: Мы – не з гіпсу, мы – з камення, Мы – з жалеза, мы – са сталі, Нас кавалі ў пламенні, Каб мацнейшымі мы сталі. (Цётка) 7) рытарычнае пытанне – пытанне, якое не патрабуе адказу, бо змяшчае ў сабе сцвярджэнне: Ці ж мы, хлопцы, рук не маем, Ці ж нам сілы бог не даў? Ці ж пад родным нашым краем Промень волі не блішчаў? (Я. Колас) |