Семянькова. Стылістыка і КБМ. А. М. Багамолава, Г. К. Семянькова
 Скачать 1.76 Mb.
|
|
Тэкст 5. На самым захадзе маёй Беларусі ляжыць Белавежская пушча. Гэта адзін з апошніх астравоў таго першабытнага лесу, які пакрываў у старадаўнія часы ўсю Еўропу. Тут зусім не рэдкасць дрэвы ў паўтысячы год. Тут з незапамятных часоў вольна жыве зубр. Магутны, як сама зямля, і старажытны, як яе запаветныя нетры. Адвечная цішыня. I шолах дрэў. I тупат зубрыных статкаў. Таксама як у каменным веку. I побач з гэтым сляды далікатнага любоўнага ўмяшання чалавека: стагі, каб падкарміць узімку звяроў, музей, хаткі егераў, сучасная гасцініца. Для праўнукаў сваіх беражэ чалавек кожную кветку, кожнае дрэва, жывёл і птушак. I такуюць, такуюць раніцай глушцы. Да штучнага возера цягнуцца цяжкія сляды япрукоў. Трубіць у нясытнай страсці алень. Дзікі вінаград абвівае буралом. I палюе на янотаў егер. I клічуць-клічуць белыя лебедзі, б’юць на рэках пудовыя шчупакі, шумяць сонечныя дубы і грабы. I чырванеюць падасінавікі. I дымок ад ранішняга вогнішча змешваецца з туманам. Усё гэта – пушча. Усё гэта – неўміручая душа яе. Яна цудоўная, як душа нашага народа. Калі вы стаміліся, калі хочаце прыпасці вуснамі да вечна жывой крыніцы жыцця – прыйдзіце сюды, у найдзівоснейшы куток зямлі. Бо тут – фарпост чалавечнасці, літасці чалавека да прыроды, сястры нашай. (У. Караткевіч) Тэкст 6. Габелен і кераміка 90-х... У музеі сучаснага выяўленчага мастацтва працуе выстава габелена і керамікі. Экспазіцыя падрыхтавана як працяг цыкла “Беларускае мастацтва 90-х”. У красавіку мінулага года ў межах цыкла экспанавалася нацыянальная графіка апошняга дзесяцігоддзя, а зараз прадстаўлена дэкаратыўна-прыкладное мастацтва. Матэрыял для выставы рыхтаваўся супрацоўнікамі музея на працягу года; адбіраліся найбольш яркія прафесійныя цікавыя працы з выстаў і майстэрняў. Выстава дае ўяўленне аб стылёвай і тэхналагічнай разнастайнасці сучаснага развіцця габелена і керамікі – гэтых традыцыйных тэхнік дэкаратыўна-прыкладнога мастацтва. Разам з творамі ўжо вядомых майстроў можна ўбачыць працы цяперашніх студэнтаў Беларускай акадэміі мастацтваў. Апроч мінскіх творцаў, удзельнічаюць таксама творцы з Віцебска, Полацка, Бабруйска, Гродна і Магілёва. Выстава прадоўжыцца да 15 студзеня. (з газеты) Тэкст 7. Узварухнуўся народ і заціх, а на самым версе курганка стаяў без шапкі Сцяпан Барута і гаварыў: – Мы вельмі рады, што прыйшлі вы на наш “фэст”, на наша маладое свята працы. Мы працавалі, каб спусціць з быстраю рэчкаю гніль Гнілога балота, каб на яго месцы зазелянеў муравою грамадскі луг. Сотні гадоў пакланяліся вы “святому калодзежу”, і сотні гадоў стаяла тут Гнілое балота, заражала паветра і разносіла хваробы. I “святы калодзеж” не памагаў вам. Таварышы! Задумайцеся над гэтым. Не “святыя калодзежы”, не малітвы бацюшак дадуць вам шчасце і дабрабыт, бо шчасце і дабрабыт – у вас саміх. Тут зроблена спроба, каб паказаць сілу дружнай грамадскай працы, і вы бачыце вынікі яе, быццам сваімі вачыма. Але мы зрабілі маленькую частку таго, што нам трэба зрабіць і што мы можам зрабіць. У нас няма добрага будынка для школы, а дзе і ніякай няма школы, у нас няма народнага дома, бібліятэкі, нашы дзеці ўлетку без догляду, нашы саламяныя стрэхі спрыяюць пажарам, нашы дарогі топяцца ў гразі, на нашых грэблях грузнуць коні, на нашых мастах калечацца людзі і жывёла. А ўсё гэта можна ўхіліць, сваімі рукамі пабудаваць новае, моцнае, прыгожае і канечне патрэбнае нам. І гэта вы зробіце, калі будзеце выступаць грамадою дружна, згодна. Дык няхай жыве свабодная праца! Няхай закрасуюць і разаўюцца грамадскія “калектывы працы”! Няхай наша нядбаласць пройдзе разам з Гнілым балотам! (Я. Колас) Тэкст 8. Дагарэў за брамай небакрай, Месяц паміж воблачкаў плыве. Выйду зноў, як у мінулы май, Басанож прайдуся па траве. Дымная, сцюдзёная раса, Цёмныя ў траве ад ног сляды. А такога рослага аўса Я не бачыў доўгія гады. Бач, хмызы спляліся, як павець, Светлякі мігцяць, гараць святлей. Перад тым, як звонка ў лозах пець, Прачышчае горла салавей. Лашчыцца трава да босых ног. 3 дальніх паплавоў плыве ракой Ледзь прыкметны сумны халадок – Подых юні ўходзячай маёй. Паімчаць за ёю наўздагон? – Хоць і схопіш – усё адно падман. Дзе каханне тых мінулых дзён – Веснік паркаў бэзавы туман? Нават шкадаванне – дзе яно? Зноў вясна, і жаль знікае зноў. (Так губляюць пах перад вясной Ссохлыя сцябліны палыноў). Ціха цмокае ў сне рака. О, як добра, як прыгожа жыць! Раска, як русалчына луска, На вадзе ад месяца гарыць. А вакол травіцы росны рай I бярозак белая сям’я. Мой чароўны беларускі край, Бацькаўшчына светлая мая! (У. Караткевіч) Тэкст 9. – А-а-а, хай дае гасподзь Алёшку шчасця. Харошы ён сам і за жонку харошага чалавека бярэ. Ты, мусіць, помніш хлапца Баршчыхінага, меншага? Ну, дык паехаў жа ён адсюль, гадоў ужо колькі. А сюды, да Баршчыхі, прыехала пазалетася жонка яго. Самога яго ў армію бралі, ну, яна і падалася да Баршчыхі, дзіця мелася нарадзіць. Жыла ўвесь час тут. Ха-а-арошая маладзіца, хоць ты станаві яе замест іконы. І тварам удалася, і характар уважыцельны, і рабацяшчая. А той, басяк, пакуль служыў недзе, другую сабе завёў. Асарамаціў і нас, аднавяскоўцаў. Ажно цэлы год не было як у вочы глянуць маладзіцы, сорамна. Але цяпер вось Алёшка! I не пабаяўся, што з дзіцём. Малайчына. Харошыя яны людзі, гэтыя Кузьмянкі. I бацька, і сын усе як адзін. (І. Чыгрынаў) Тэкст 10. Уявіце звычайную вясковую хату: літаральна на 20 метрах жылой плошчы побач з гаспадарамі туліліся розныя духі. Найперш дамавік альбо хатнік, у якого была свая сям’я. У падпеччы жылі малыя гарбатыя скручаныя злыдні ў ботах. А ў дамах, дзе памерлі нехрышчоныя немаўляты альбо былі загублены дзеці, сяліліся бяскрыўдныя кікімары. У іншых сялянскіх пабудовах таксама было сваё “насельніцтва”: лазнік, пуннік, хлеўнік, гуменнік. Яшчэ існавала і вялікая колькасць нячысцікаў: хохлікі, страхі, якія выпаўзалі ноччу, таму часам і чутны былі розныя стукі-грукі. Каб гэтая нечысць не пранікла ў хату, і патрэбен быў дамавік. Іншым разам за плетнем грукат, гэта значыць нечысць лезе ў хату, а дамавік з ёй змагаецца. Было сваё насельніцтва і ў лясах, палях, вадаёмах. У беларускай міфалогіі вялікая колькасць каларытных жаночых вобразаў. Цікавы персанаж – Лойма. Жанчына, якая ператваралася ў жабу і пужала людзей. Часам гэта была прыгожая дзяўчына, якая чаплялася да адзінокіх мужчын у лесе, але ж як звядзе, распаліць каханне, выслізвае з абдымкаў і знікае. Ля вады, лічылася, можна сустрэць бяскрыўдную рассамаху – голую жанчыну з распушчанымі валасамі, якая трымае на руках немаўля. Па павер’ях – гэта жанчына, якая забіла сваё дзіця, а сама ўтапілася. Вялікая колькасць у нас паданняў пра русалак. Адны з іх – бавяць час у лесе, гушкаюцца на галінах, другія – бадзяюцца па нясжатых палях, трэція, азёрніцы, жывуць у вадзе. Беларуская русалка – гэта прыгожая дзяўчына з доўгімі валасамі зялёнага, чорнага або русага колеру. Вочы ў яе халодныя, а скура – празрыстая. Беларуская русалка абавязкова з нагамі, з хвастом толькі азёрніцы. Русалкі жывуць з вадзяніком, а ён вельмі брыдкі: з вялікім жыватом, на тонкіх нагах з перапончатымі пальцамі. Таму і шукаюць русалкі сабе мужоў, чапляюцца да мужчын і казычуць іх да смерці. У нашых продкаў некаторыя хваробы і смерць мелі выгляд жаночых істот. А ўвогуле ў паганскай міфалогіі можна назбіраць персанажаў на ўсе выпадкі жыцця. (з часопіса) Тэкст 11. Усе, хто бываў на Пастаўшчыне, пацвердзяць, што гэта край з харызмай. І не зразумееш, што надае яе. Можа, маляўнічая прырода, бо толькі азёр тут больш за сотню. Альбо багатая 600-гадовая гісторыя і вялікая колькасць цікавых помнікаў архітэктуры. Ці самі людзі, што шануюць традыцыі і цікавяцца мінуўшчынай свайго краю. А магчыма, усё гэта разам. На ўзгорку на падмурку драўлянага францысканскага кляштара стаіць велічны касцёл св. Антонія Падуанскага – візітоўка Паставаў. У Першую сусветную вайну ён быў значна пашкоджаны, і ў 1920-я гады вернікі яго аднавілі. А вось савецкую ўладу перажыць ён не здолеў. У маі 1949 года яго зачынілі. У храме на доўгія часы размясціўся філіял прамысловага прадпрыемства. Званы маўчалі роўна 40 гадоў, да мая 1989 года, калі касцёл нарэшце вярнулі католікам. Касцёл у гонар святога Яна Хрысціцеля – стары храм з вельмі багатай гісторыяй. Можа, на фота ён выглядае трохі панура, але месца гэтае вельмі цікавае. Гэта адзін з трох храмаў-крэпасцей у Беларусі (два іншыя – у Сынкавічах і Мураванцы), які дзейнічае ўжо больш за 400 гадоў і не зачыняўся нават у савецкія часы, што само па сабе ўжо цуд. Кажуць, што ў гады Вялікай Айчыннай вайны тутэйшы ксёндз выратаваў ад фашыстаў нейкага партызана, які потым стаў партыйным функцыянерам і закінуў слоўца за храм. Сцены касцёла амаль у два метры таўшчынёй, і як напамін аб падзеях Паўночнай вайны ў сценах можна бачыць гарматныя ядры. Праўда, іх туды ўмуравалі адмыслова. Храм вядомы яшчэ і 400-гадовым цудатворным абразом Маці Божай, адной з карцін вядомага мастака другой паловы XIX стагоддзя Альфрэда Рамэра, і 100-гадовым аргáнам, на якім іграў знакаміты музыка Браніслаў Руткоўскі. Асаблівай увагі заслугоўвае энергічны і дапытлівы настаяцель Яцэк Хутман, які бясконца вывучае таямніцы храма, а нядаўна знайшоў пад алтарнай часткай касцёла яшчэ адно пахаванне, магчыма, нават фундатараў храма. Пра палац Бішэўскіх у Лынтупах існуе прыгожая легенда. Малады ўладальнік Лынтупаў Юзаф падчас вучобы ў Парыжы закахаўся ў адну французскую актрысу і прапанаваў ёй руку і сэрца. А яна паабяцала, што выйдзе за яго замуж толькі тады, калі ён пабудуе для яе цудоўны палац, які адпавядае яе становішчу. Бішэўскі быў архітэктарам і сам заняўся праектаваннем дома. І ў выніку пабудаваў цудоўны дом з паркам, шырокімі алеямі і сажалкамі. Але дарэмна. Каварную прыгажуню ён не ўразіў, яна фыркнула і з’ехала назад у свой Парыж. А Юзаф так і застаўся халасцяком. Калісьці галоўную плошчу Паставаў называлі Рынкавай, а цяпер яна завецца плошчай Леніна. Таму што цэнтральная і на ёй стаіць помнік правадыру пралетарыята. Дарэчы, помнік унікальны, бо самы малады сярод усіх беларускіх помнікаў Леніну. Але адметнасць плошчы не ў гэтым. Яна стала адной з першых ансамблевых забудоў на тэрыторыі Беларусі. Усе дамы на ёй узводзіліся не як прыйдзецца, а ў адзін час і па праекце аднаго архітэктара – італьянца Джузепэ дэ Сака. Дарэчы, галоўнага архітэктара ўсяго Вялікага княства Літоўскага. З 22 будынкаў да нашых дзён захавалася толькі шэсць, аднак выглядае плошча вельмі цэласна і гарманічна. Характэрныя фігурныя фасады домікаў надаюць Паставам рысы еўрапейскага гарадка. У адным з іх – у доме аптэкара – пастаўчане ўжо 250 гадоў купляюць лекі. Калісьці ў ім жыў лекар, а потым, каб не парушаць традыцыі, там размясцілі аптэку. Многія вандроўнікі адзначаюць незвычайнае размяшчэнне дзейнага касцёла св. Тадэвуша ў вёсцы Лучай. Калі ехаць на аўтамабілі, то на працягу некалькіх кіламетраў да яго вядзе роўная, як страла, дарога. Здаецца, што заедзеш на прыступкі храма, які ганарліва ўзвышаецца над дрэвамі. Паварот дарогі заўважаеш толькі значна бліжэй. Касцёл у вёсцы Лучай быў пабудаваны ў 1766 годзе дзякуючы шчодрасці мясцовага магната з роду Агінскіх. У пасляваенны час храм быў перапрафіляваны пад калгасны склад, і, на жаль, гэта не дазволіла захаваць усе роспісы на яго сценах. А інтэр’ер святыні вельмі цікавы, выкананы ў тэхніцы грызайль. Гэта рэльефны жывапіс: глядзіш на сцяну – і здаецца, што ў ёй арка з ляпнінай, а на самой справе гэта толькі малюнак. Апошні, сёмы, цуд Пастаўшчыны – Зюзя Паазерскі, паганскі бог холаду. З’яўляецца ён у выглядзе старэнькага дзядка з белымі, як снег, валасамі і такой жа белай даўжэзнай барадой. Пасяліўся ён тут дзякуючы ініцыятыве Ягора Шушкевіча, дырэктара пастаўскага Цэнтра турыстычных паслуг, які высветліў, что менавіта Зюзю шанавалі нашы далёкія продкі, калі яшчэ не было Санта-Клаўса і Дзеда Мароза. Гэты бог пануе на Беларусі толькі зімой і вельмі любіць прымаць гасцей у сваёй сядзібе “Азяркі”. А летам хаваецца ў густых пастаўскіх лясах. Але гэта зусім не азначае, што ў гэты ўтульны куточак нельга прыехаць у іншы час, акрамя зімы. Сядзіба круглы год гасцінна расчыняе вароты для турыстаў. (з газеты) Тэкст 12. Ноччу вецер лагодна гартаў лісты за акном – перачытваў, а пад самую раніцу так усхадзіўся, так завірыў, што раз-пораз стукаў мне незадаволена гэтымі лістамі ў шыбы, нібы настойліва запрашаў пачытаць разам. …І я мусіла выйсці насустрач шэрай раніцы. Змяла лістоту з ганка, зазірнула ў адчыненую паштовую скрынку, а там – лісты… Сябры пішуць усё радзей, а то і зусім не пішуць. Тэлефоны, бачыш, эканомяць іх час. Але толькі нямыя лісты і паштоўкі гавораць з намі галасамі сяброў нашых праз гады. Саджуся на лаўку, трымаючы ў руках сваю восеньскую пошту. А вецер ужо суцішана шэпча сухімі лістамі: не спяш-ш-шайся, пач-ч-чытай… Вось ліст кляновы, жоўты, з зялёнымі жылкамі – сведка паступовага згасання летняга хараства… Яшчэ многія дрэвы будуць трымаць свой ліст, а клён адпускае... Гэтак жа і я рана адпусціла сваё першае і таму непаўторнае. Адпусціла лёгка, як дрэва адпускае жоўты ліст з першым моцным ветрам. Клён рос каля возера, вялікі і моцны; мы там лавілі хрушчоў, садзілі ў маленькія каробачкі і, прыклаўшы да вуха, слухалі радыё... Радыё гудзела незадаволена, нецярпліва шкрэбла лапкамі – і мы яго выпускалі. Кожны дзень, калі ты выходзіў пагуляць да мяне і маёй сяброўкі, цябе клікала маці. Яе прарэзлівы голас і цяпер яшчэ рэжа маю цішыню. …Вось ліст дубовы, маленькі, карычневы – адбітак сонечнай ласкі. Спаліла тая ласка цябе, лісток, заўчасна. Такая празмерная ласка заўсёды некага замучыць, а то і зжыве зусім. Дубы раслі ля калгаснага сада; дазорам акалялі яны грушы і паляну, перасыпаную купкамі чабору. А нам, малым, так хацелася тых сало-о-одзенькіх грушак! І ўдыхнуць таго траўнага водару, які, здаецца, і цяпер яшчэ кружыць мне галаву – у сад майго маленства кліча... Вось ліст рабіны. Ссох, скурчыўся, склаўся ў кулачок. На каго злуеш, даражэнькі? Злосць яшчэ нічога не ўпрыгожыла на гэтым свеце. Ды і на тым таксама. …Рабіна расла каля хаты маёй сяброўкі; тады здавалася, што гараць гронкі запрашальным полымем – “заходзь на агеньчык”. А цяпер нібы сігналіць рабіна, як святлафор: чырвоны – значыць няма ходу. Вось і думай цяпер сваёй галавой, а не чужой… Чужая галава так навучыла, што жывуць у тым доме іншыя людзі, а сяброўка тая ўжо не мая – чужая!.. …Адкуль ты тут, ліст з таполі? Счарнелы і скурчаны, як прачытаная, спаленая і выкінутая паштоўка. Не ўчора, значыць, пакінуў галіну гэты ранні вандроўнік. Не дай Божа нікому рана пакікуць бацькоўскую хату па ўласным жаданні, а потым счарнець вось так, сумуючы па ёй… Таполі растуць за бацькоўскім агародам. Адна вялізная, адзін за тры разы не ахопіш, казалі, засталася яшчэ з панскага парку, астатнія, меншыя, абступаюць яе – слугуюць, як дзеці, удзячныя маці… Лістоў “у таполях” насыпáлася процьма, і я бегала па іх, прыслухоўваючыся да восені… Я спявала сабе. Я марыла аб далях… Потым мама клікала мяне – і я неслася, расставіўшы рукі самалёцікам, дадому. Пакліч мяне, мамачка, і я кіну свае справы, як тыя жоўта-чорныя лісты, і прыбягу да цябе зноў… (А. Багамолава) Тэкст 13. Мабыць, галоўныя адрозненні ў псіхіцы беларуса і жыхароў мясцін, дзе мала лясоў, склаліся пад уплывам навакольнага пейзажу. Лес выхаваў характар беларуса. Наш чалавек і лес – родныя, і таму беларус любіць яго. Любіць паўночныя саснякі з імхом, які расшыты каралямі брусніц і чарніц, што лілавеюць верасам, у якім сядзяць сімпатычныя карычнева-чырвоныя і карычнева-чорныя баравікі. Любіць змрочныя яловыя лясы з цэлямі бародамі сівога моху на ствалах і з катлавінкамі, напоўненымі празрыстай, але на выгляд чорнай і бліскучай, як лак, вадою. Нават драбналессе з бялюткімі бярозамі і асінкамі, нават змрочныя чорнаальховыя лясы дарагія яму. Лес корміць, лес грэе і дровамі, і сценамі хат, лес бароніць у выпадку небяспекі, нашэсця, вайны. Менавіта таму столькі ўвагі аддаецца захаванню, абароне, развядзенню лясоў. Недахопаў у гэтым яшчэ шмат, аднак праца ляснічых і палясоўшчыкаў, азеляняльнікаў, батанікаў, заолагаў, паляўніцтвазнаўцаў паступова прыносіць свой плён. Пад ахову ўзяты многія жывёлы, расліны, рыбы, птушкі і звяры, асобныя дрэвы і цэлыя лясныя масівы. У Беларусі існуе шмат заказнікаў і запаведнікаў. Бярэзінскі запаведнік абараняе ўвесь жывёльны свет, але асабліва мядзведзя і бабра. У Белавежскім запаведніку галоўнымі панамі з’яўляюцца высакародны алень, бабёр, лось і зубр. А Прыпяцкі запаведнік створаны для аховы раслін, звяроў, птушак, якія сустракаюцца на Палессі. (У. Караткевіч) Тэкст 14. І наступіла восень. Верасень жаўціў дзе-нідзе лісце на бярозах, а каштаны на цэнтральных вуліцах горада, дзе было шмат машын, зусім пажоўклі. Павуцінне з малюпасенькімі павучкамі залятала нават у горад, ляцела сівымі ніцямі ў паветры, чаплялася за рамы, за галіны дрэў, за клумбы, дзе дагаралі незгасальным агнём чырвоныя вяргіні. З каштанаў падалі зялёныя калючыя шары, разбіваліся аб асфальт, і з мясістай абалонкі выглядаў вільготны, карычневы плод. Дзеці падбіралі іх і рабілі каралі. Нават дарослым хацелася часам, калі ніхто не бачыў, прыкласці халодны карычневы шарык да вока ці да шчакі. А закаханыя, калі знаходзілі два каштаны ў адной калючай бомбе, бралі іх сабе на шчасце. Над ракой пачынаў ужо віцца туман, і гарэлі на ўзлессях прыгарадных лясоў асіннікі, як быццам жадалі сказаць людзям, што, пакуль яны гараць і грэюць неба, няма чаго баяцца ранішніх халадоў: асіна заўсёды чырванее першай, калі яшчэ цёпла. Яна – зябкае дрэва і нават летам дрыжыць пад цёплым ветрам. Берасневіч прыехаў у горад раней за іншых студэнтаў, і для яго з Алёнкаю пачалася другая вясна. Увосень пачуцці робяцца больш вытанчанымі, яны прасякнуты як быццам сумам адыходзячай восені і памірання жоўтых лісцяў. Іншы раз здаецца, што побач з табою не каханая, якую ты ведаеш да апошняга жэсту, а любімая сястра. Так было і з імі… (У. Караткевіч) Тэкст 15. Адміністрацыя Першамайскага раёна г. Віцебска ад 08.05.2002 №161 Аб прызначэнні апёкі, грашовых выплат, прысваенні і зняцці статусу “апякунская сям’я” Выпіска з рашэння Разгледзеўшы заявы грамадзян, кіруючыся арт.142, 143, 144, 145, 148, 149, 151, 153, 154 “Кодэкса Рэспублікі Беларусь аб шлюбе і сям’і”, інструктыўна-метадычным пісьмом “Аб матэрыяльным забеспячэнні дзяцей-сірот, якія засталіся без апекі бацькоў…”, адміністрацыя Першамайскага раёна вырашыла:
Галава адміністрацыі В.М. Ціценка Упраўляючы справамі К.Я. Кавалёў Тэкст 16. У пачатку ХІІ ст. у Балоньскай школе, ці ўніверсітэце, (Італія) ужо былі студэнты. Гэта слова паходзіць з лацінскага “студэнс” – старанна займацца, працаваць. Шлях студэнта (на першым этапе вучобы ён зваўся схалар) пачынаўся з запісу яго на падрыхтоўчы факультэт. Пасля чаго ён пераходзіў на адзін са “старэйшых” факультэтаў: багаслоўскі, медыцынскі або юрыдычны. Лекцыі пачыналіся з пяці гадзін раніцы і працягваліся чатыры гадзіны. Падручнікаў не было, лекцыі запісваліся. Самым стамляльным быў выпускны экзамен. На студэнта на працягу дня (з шасці гадзін раніцы да шасці вечара) “нападалі” не менш чым два дзесяткі апанентаў. Пры гэтым сам студэнт не павінен быў ні адпачываць, ні есці, ні піць. Пасля здачы экзаменаў усё завяршалася “банкетам Арыстоцеля”. (І. Шпадарук) Тэкст 17. Якая яна, мая зямля? Гэта ў мінулым гераічная і шматпакутная зямля. Безліч разоў грукаталі па ёй калясніцы вайны. Але мы, дзеці Беларусі, ганарымся тым, што ў гэтых войнах яна ніколі не была агрэсарам. Іншая справа, што яна заўсёды мужна і да канца бараніла свой дом, сваю праўду і веру. Памяць маёй зямлі пра гэта і ў старадаўніх гарадзішчах, і ў курганах, пад якімі спяць яе абаронцы, і ў барвовых, быццам ад крыві, мурах замкаў, на палетках, дзе працавіты плуг часам выворвае каменную сякеру, меч або гільзу часоў апошняй вайны, і ў вечных агнях перад помнікамі салдатам. І перш за ўсё, памяць маёй зямлі – гэта людзі і іх вечная, неўміручая праца. Араць палі, біць студні, расціць сады, плесці з каменю і дрэва карункі дзівосных будынкаў, спяваць песні, складаць вершы. Таксама якасць нашай памяці: ніколі не аддзяляць сябе ад культуры і самаахвярна ствараць яе, якія б перашкоды не ўставалі на шляху. Стварыць непаўторны фальклор, першымі ў свеце сярод усходніх славян надрукаваць Біблію ў перакладзе на родную, беларускую мову. І не перарываць ані на год той стыхіі, плыні той вялікай ракі, якая валадарыць чалавечым сумленнем і душамі і імя якой – літаратура. Шанаваць памяць яе дзеячаў, ствараць на месцах, дзе яны нарадзіліся і дзе паэзія нарадзілася ў іх душах, запаведнікі. І там калыска можа нарадзіць Песню і Неўміручасць. (У. Караткевіч) Тэкст 18. Яны ішлі праз лес глухой, замеценай снегам дарогай, на якой не было ні чалавечага следу, ні каляіны. Тут, мусіць, і ўлетку не часта езділі, а цяпер, пасля доўгіх лютаўскіх мяцеліц, дык і ўсё зараўняла снегам. І ўсё ж яны не памыліліся. Углядаючыся праз голы, затуманены прыцемкамі хмызняк, Рыбак усё больш пазнаваў гэтую пуцявіну, якую ён памятаў яшчэ з восені. Тады іх чалавек пяць з групы Смалякова неяк пад вечар таксама прабіраліся па гэтай дарозе на хутар, каб раздабыць харчу, адпачыць і пасушыцца ў цяпле. Над вяршаллем хвой угары лёгка слізгаў вышчарблены маладзічок месяца, які амаль не свяціў, толькі ледзь бліскаў у імглістым ззянні, аздабляючы змрочнае без зор неба. Але з ім было неяк весялей, нібы хто жывы рупна праводзіў у гэтай дарозе. У лесе было змрачнавата, аднак паблізу, па чыстай белі снягоў, няблага ўгадвалася дарога. Тое, што яна аказалася зусім без следу, хоць і давала нагам працы, але засцерагала ад нечаканасцей: наўрад ці хто будзе пільнаваць іх тут, у гэтай глушэчы. Тым не менш Рыбак усё ж асцярожнічаў, асабліва пасля няўдалага заходу ў Гліняны, дзе яны, пэўна, трапілі б у рукі немцаў, калі б не адзін сустрэчны дзядзька. Дзядзька папярэдзіў, што пад вечар у вёску наехала немцаў, і яны павярнулі ў лес, да гэтага хутара. (В. Быкаў) Тэкст 19. Максім Багдановіч… Кароткі быў яго жыццёвы шлях. Ён вымяраецца дваццаццю пяццю гадамі. Многія літаратары ў такім узросце толькі пачынаюць тварыць. Ён жа – закончыў. І, можа, таму, што прадчуваў блізкую развязку, спяшаўся, працаваў, не шкадуючы сябе: абы паспець сказаць тое, што хвалявала яго сэрца і што не магло не выліцца ў творы. У яго не было зацягнутага перыяду вучнёўсва. Пра сябе як паэта ён заявіць адразу і адразу ж упэўненай хадой пойдзе наперад, пераадольваючы цяжкасці. А іх было нямала. Толькі пяць гадоў жыў ён на Беларусі. Астатняе жыццё прайшло па-за яе межамі. Таму родную мову, на якой рашаецца тварыць, давядзецца вывучаць па бацькавых этнаграфічных запісах ды па кнігах. І наперакор вялікадзяржаўным скептыкам, якія не прызнавалі за беларускай мовай яе самастойнасці, дакажа, што яна ніколькі не бяднейшая і не горшая за іншыя мовы, што ёй падуладны ўсе віды і жанры, зведаныя і асвоеныя высокаразвітымі літаратурамі, і што на ёй можна паспяхова перадаваць найтанчэйшыя адценні чалавечых пачуццяў. Шмат часу мінула з тае пары. Сёння мы ўжо не баімся даваць яму найвышэйшую ацэнку, не баімся ставіць яго імя побач з імёнамі выдатных еўрапейскіх пісьменнікаў. Створанае ім вытрымала выпрабаванне часам і не толькі не паблякла, а, наадварот, яшчэ ярчэй зазіхацела, здзіўляючы сваім хараством увесь славянскі свет. (А. Бачыла) Тэкст 20. Мужчына. Жанчына. Чаканне. Шуканне. Блуканне. Час. Жанчына. Мужчына. Спатканне. Вітанне. Пытанне. Адказ. Мужчына. Жанчына. Дыханне. Сэрцабіццё. Забыццё. Жанчына. Мужчына. Каханне. Мужчына. Жанчына. Жыццё. (А. Вярцінскі) Тэкст 21. Праўда належыць да надзвычай тонкіх каштоўнасцяў і, перададзеная без любові, можа глыбока параніць чалавека і нават скалечыць яго на ўсё жыццё. Перададзеная ж з любоўю, часам вельмі горкая праўда не знішчае чалавека, а ўзбагачае. Каб мець права рабіць заўвагу, трэба яшчэ любіць чалавека, якому гэта праўда гаворыцца. Хочацца вылучыць два прынцыпы, якія трэба мець на ўвазе, гаворачы праўду іншым людзям. Першы прынцып – гэта усведамленне сваёй уласнай слабасці. Гэта пра тое, што мы заўважаем парушынку ў воку свайго брата і забываем пра бервяно, якое тырчыць у нашым уласным воку. Бывае, што мы спрабуем папраўляць іншага чалавека, указваючы яму на яго памылкі, якія часам у сто разоў меншыя за нашы ўласныя. Трэба пачаць з сябе, з выцягвання бервяна з уласнага вока. Толькі такі чалавек зразумее, колькі патрэбна намаганняў, каб выправіцца. Дзейсна можна дапамагчы іншаму толькі тады, калі на ўласным прыкладзе пакажам магчымасць выпраўлення саміх сябе. Усведамленне ўласнай слабасці змушае да вельмі асцярожнага ўказвання на памылкі іншаму чалавеку. Другі прынцып. Сяброўская заўвага, на мой погляд, робіцца без сведкаў і непасрэдна таму чалавеку, які зрабіў памылку, бо нельга гаварыць пра памылкі іншага за вочы. Калі ж гэта будзе безвыніковым, трэба узяць сведку і не з ім, але ў яго прысутнасці зрабіць заўвагу таму, хто памыліўся. І толькі тады, калі і гэта не дапаможа, можна раскрыць праўду, робячы яе агульнавядомай. Калі ж і гэта не дапамагло, то трэба адысці ад такога чалавека, каб яго нядобрыя паводзіны не ўплывалі на вас. Часцей за ўсё замест таго, каб з любоўю зрабіць заўвагу непасрэдна таму, хто гэтага заслугоўвае, людзі крытыкуюць яго за вочы. Канешне, рабіць заўвагу нялёгка. Але, мне здаецца, калі гэта адбываецца па гэтых прынцыпах, то прыносіць плённыя вынікі. Такім чынам, трэба было б рабіць заўвагі іншым так часта, як часта мы самі здольныя ўспрымаць заўвагі, тады мы здолеем захаваць раўнавагу крытыцызму. Пры гэтым варта памятаць, што пакуль побач з намі ёсць хтосьці, хто нам робіць заўвагі, датуль усё добра. Калі ж праходзяць тыдні і нават месяцы і ніхто нам не робіць заўвагу, то гэта зусім не азначае, што мы – дасканалыя і не робім памылак. Хутчэй за ўсё гэта значыць, што побач з намі няма чалавека, які б нас па-сапраўднаму любіў, якога б не хвалявала тое, што з намі адбываецца. Калі такога чалавека не будзе, то мы застанемся ў адзіноце – а гэта ўжо няшчасце. Хачу падзякаваць тым, хто мае адвагу сказаць нам праўду і хочацца пажадаць, каб усе мелі адвагу з любоўю і павагай сказаць праўду блізкім. Гэта абавязаны рабіць кожны, хто па-сапраўднаму любіць. (К. Мажаева) Тэкст 22. Стракаты натоўп, пастаяўшы з хвіліну на вуліцы, азіраючыся, рашуча рушыў да брамкі. Маці, угледзеўшы гэту праяву праз акно, кінула ўсе справы і пабегла зачыняць дзверы, ляпнуўшы зашчапкай перад самым носам першай цыганкі, якая ўжо ступала на ганак (Зрэшты, ці цыганкі гэта насамрэч былі, заставалася толькі гадаць: апошнім часам зламыснікі навучыліся маскіравацца пад цыганоў, каб пасля іх цяжэй было пазнаць). Яны не спяшаючыся, сыплючы, напэўна, праклёны сваімі гартаннымі галасамі, ішлі з двара. На вуліцы іх ужо чакалі блакітныя “Жыгулі”, якія павольна паехалі ўслед за гэтымі кабетамі з вялізнымі паласатымі торбамі. Падумалася: калі што якое – скочылі ў машыну, і шукай ветру ў полі... За такую негасціннасць я маму не дакарала вельмі. Па-першае, з таго, што гандляркі, ходзячы па вёсцы, прадаюць, хай сабе і вельмі танна, нешта купляць – сябе не паважаць. Панчохі, якія за ўсё сваё нядоўгае існаванне так і не адмыюцца ад паху бензіну, ці кашулю, якая на кашулю падобная толькі да першага мыцця, а пасля – хутчэй на тую самую панчоху – выбачайце, але дзякуй... Па-другое, ёсць вельмі сур’ёзныя падставы думаць, што гандаль – не галоўны занятак гэтых тётак у стракатых спадніцах. У вялікіх “чаўноцкіх” валізках зручна не толькі цыгнуць нікому не патрэбны тавар, але і хаваць тое, што сцягнуў у няспраўджаных пакупнікоў. Пра гэта лепш як хто можа расказаць 82-гадовая бабуля Рэня, добрая, спагадлівая жанчына, якая за жыццё сербанула нямала гора, але не развучылася давяраць і шкадаваць. Яны прыйшлі ў яе хату нядаўна, якраз у самую сакавіцкую слату, расклалі свае анучы, наперабой прапануючы купіць што-небудзь. Бабка нічога купляць не стала, але паспачувала небаракам, якія вымушаны такой слатой цягацца за свет, і прапанавала ім пагрэцца з вуліцы кавай. Пакуль пілася тая кава, пакуль цякла зацікаўленая спагадлівая гутарка, адна з гандлярак шуравала ў бабулі ў зале. Калі яны, шчыра падзякаваўшы за пачастунак, пайшлі, гаспадыня недалічылася ўсіх наяўных прыхаваных на запас грошай. новага электрычнага чайніка. што нядаўна падарыў сын, усіх больш-меньш новых рэчаў, якія былі ў гардэробе. Аглядзелася, калі “гасцей” і след прастыў, дый, думаецца, яны пасля таго візіту доўга ў вёсцы не затрымаліся... Не ведаю, ці перастала бабка верыць людзям пасля таго выпадку. Наўрад ці. Але цяпер для надзейнасці – каб не было спакусы кагосьці незнаёмага шкадаваць – яна ўвесь час трымае дзверы зачыненымі. Як і ўсе астатнія адзінокія пенсіянеры (а іх у нашай вёсцы большасць). Тыповая карціна, ці не так? Цяпер уся вёска, асабліва калі яна невялікая і аддалёная ад райцэнтра, жыве, нават днём, замкнуўшыся знутры на вочапкі, засаўкі, замкі. Вёска, у якой яшчэ гадоў трыццаць назад не было моды замыкаць хату, сыходзячы куды-небудзь недалёка, у краму, напрыклад. У лепшым выпадку – накінуць клямку без замка ці падперці дзверы якім кійком або венікам. Галоўнае, падаць яскравы знак, што нікога дома няма, а калі гаспадары не ў хаце – хто і чаго ў яе пойдзе. Проста, шчыра і на сённяшні дзень – нерэальна. Змяніўся свет, у якім мы жывём, – ён стаў больш жорсткім, змянілася жыццёвая філасофія, у якой цяпер кожны сам за сябе. Змяніліся мы ўсе – мы ўсё менш верым і давяраем адзін аднаму. Самі вяскоўцы не змяніліся – яны проста вельмі, вельмі пастарэлі. І яны замыкаюцца знутры нават днём – ад ліхіх людзей. Толькі так яны адчуваюць сябе абароненымі (хаця б умоўна) ад таго, пра што ледзь не кожны дзень перадае тэлебачанне і пішуць газеты: там пенсіянера абакралі, там малады дваццацігадовы недавярак згвалтаваў сямідзесяцігадовую бабулю, якая жыла адна… Сенцы і брамкі адчыняюцца без страху насцеж толькі на выхадныя, калі прыязджаем мы – гарадскія дзеці. Нашы састарэлыя бацькі тады нікога і нічога не баяцца, зрэшты, так яно і павінна быць, паводле спрадвечных законаў мы – іх надзея, апора і абарона. Але мінаюць выхадныя, машыны, цягнікі і аўтобусы вязуць нас да нашых цагляных гмахаў у нашы вялікія і малыя гарады, і нашы дарагія людзі зноў застаюцца сам-насам са сваімі вясковымі праблемамі і што самае страшнае і трывожнае – з небяспекай. З рэальнай небяспекай, калі ноччу ці нават удзень ліхія людзі могуць прыйсці ці прыехаць невядома адкуль і абакрасці, пакалечыць, наздзекавацца. І што крычаць, калі побач – пустая хата, а з другога боку жыве гэткая самая адзінокая старая (у яе чацвёра дзяцей, і яны добрыя дзеці, наведваюць маці часта, прывозяць унукаў, але жыве яна адна), якая таксама а, як толькі прыцямнее, замыкаецца на ўсе засаўкі і палахліва прыслухоўваецца, убачыўшы на столі святло ад фараў якой запозненай машыны: ці не каля яе хаты, крый Божа, спынілася… І што званіць у міліцыю, калі да райцэнтра – трыццаць кіламетраў, да ўчастковага ў суседняй вёсцы – дзесяць. Гадоў з пяць назад у суседняй вёсцы зімой сярод ночы ў адзінокага старога з хлява вывелі свіней, пагрузілі ў машыну і павезлі. Дзед усё гэта назіраў з акна, але высунуцца з хаты, каб патэлефанаваць ад суседзяў (тэлефон у вёсцы ёсць далёка не ў кожнага) ці паганяць зладзеяў, не асмеліўся, баючыся за сваё жыццё. І, у прынцыпе, яго можна зразумець. Адзіная не вельмі надзейная, але ўсё ж рэальная страхоўка ад страшнай неспадзяванкі – самаабарона: высокі плот, моцныя дзверы з надзейным замком, ліхтара на падворку, які хоць і свеціць у вокны, але ж і асвятляе ўсё вакол, вялікі злосны сабака каля хаты. Хаця і гэта не гарантыя, часам нават наадворот. Бабулю Марыю, якая таксама жыве адна, яе любімы “каўказец” Рэкс (во каго баяліся няпрошаныя госці!) ад лішку пачуццяў паваліў, і жанчына апынулася ў бальніцы з пераломам шыйкі бядра – для састарэлага чалавека гэта амаль гарантаваны прыгавор на інваліднасць. Калі ў хворай сабраліся заклапочаныя дзеці і ўнукі, нехта з іх папракнуў бабулю: казалі табе, навошта гэткі вялікі сабака, цяля цэлае. Старая ж цалкам рэзонна заўважыла: а ён жа, сынок, тваю работу рабіў. Ты ж маці кінуў, з’ехаў. Сабака хоць гаўкаў, мяне ахоўваючы… (з газеты) Тэкст 23. Слова сатыра паходзіць ад назвы рымскай стравы “ланкс сатура” – усялякая ўсячына, мешаніна (тыпу вінегрэта). Луцылій (ІІ ст. да н. э.) пісаў вершы, якія называліся “сатырамі”, бо ён карыстаўся змешанай (як у сатурах) літаратурнай формай. У далейшым так сталі называць рэчы ў духу Луцылія, які ставіў мэтаю асуджэнне заган і выпраўленне нораваў грамадства. Лацінскае слова “тэмпераментум” азначае ‘суразмернасць, належныя суадносіны частак, правільная сумесь вадкасцей’, ад лацінскага “гумар” – вадкасць. Яшчэ Гіпакрат, затым Гален вучылі, што 4 сокі мае чалавечы арганізм: кроў, слізь, жоўтую і чорную жоўць. Правільныя суадносіны сокаў (вадкасцей) даюць здароўе, няправільныя – выклікаюць хваробы. Нават слова халера хавае след грэчаскага “холе” – жоўць. А вульгарнае малахольны паходзіць ад назвыч чорнай жоўці. Па тэмпераменце людзей падзяляюць на сангвінікаў, халеракаў, флегматыкаў і меланхолікаў. Зараз зразумела, чаму наступнае слова гумар вызначае пачуццё, якое спадарожнічае добраму характару, здароўю, настрою, звязанаму з паняццем аб добрым стане вадкасцей (сокаў) у арганізме. Гумар – дабрадушна-насмешлівыя адносіны да чаго-небудзь, адлюстраванне ў мастацтве чагосьці смешнага. У адрозненне ад сатыры гумар не выкрывае, а незласліва, весела высмейвае. (І. Шпадарук) Тэкст 24. Жалейка – уласнабеларускае слова ад жаль. Назва дадзена па характары гуку, якім вызначаіся гэты духоўны інструмент. З 2-й паловы ХІХ ст. халейка інтэнсіўна выцясняецца кларнетам (лацінскае “кларус” – ясны гук). Гуслі – агульнаславянскае слова з праславянскага “гондслі”, якое звязана з дзеясловам гудзець. Само слова гудзець у некаторых мовах захавала значэнне “іграць” (чэшскае “гудба” – музыка, рускае “гудошник”). Мяркуюць таксама, што слова паходзіць ад санскрыцкага кораня “гу”, звязанага з паняццем гучання наогул. У рускай літаратуры слова “гуслі” сустракаецца з ХІ ст.; упамінаюцца гуслі і ў “Словах” К. Тураўскага (ХІІ ст.). У назве музычнага інструмента саксафон гучыць імя яго стваральніка – бельгійца А. Сакса. Другая састаўная частка – ад грэчаскага “фоне”, якое азначае ‘гук’. Слова барабан паходзіць ад “балабан”, “дарабан”. Так у цюркскіх мовах называецца гэты музычны інструмент. А слова “дарабанчы” азначала таго, хто іграе на ім.найбольш ранняе сведчанне існавання барабана на Беларусі адносіцца да ХІІ ст. (шахматная фігурка ў выглядзе барабаншчыка з Ваўкавыска). (І. Шпадарук) Тэкст 25. З акта Ягайлы і яго братоў аб саюзе Літвы з Польшчай Выдадзены ў Крэве 14 жніўня 1375 г. Мы, Ягайла, з ласкі Божай вялікі князь Літоўскі, рускі гаспадар прыроджаны, абвяшчаем усім, каму належыць, і тым, якія гэты ліст бачыць будуць, тое, пра што нам паведамілі… Ягайла, як асвечаны князь Літоўскі, выправіў сваіх паўнамоцных паслоў… да яе каралеўскай вялікасці… Паслы яго…, стаўшы перад каралевай, гэтак, выкладаючы справу гаварылі: “Многа цэзараў, каралёў і розных князёў прагнулі заваяваць сталыя стасункі з тым жа вялікім князем літоўскім; але Бог усёмагутны наканаваў гэта асобе вашай каралеўскай ягамосці. Таму, найяснейшая пані, … вазьмі вялікага князя Ягайлу за сына і аддай яму ў жонкі найбольш каханую дачку сваю Ядвігу, каралеву польскую. …Вялікі князь Ягайла прагне прыняць веру каталіцкую святога рымскага Касцёла… Той жа вялікі князь Ягайла абяцае і гарантуе ўласным коштам і стараннем вярнуць каралеўству польскаму ўсе краі, кім бы яны ад яго не адарваны і забраны… Нарэшце, той жа вялікі князь Ягайла абяцае землі свае літоўскія і рускія на вечныя часы да кароны каралеўства польскага далучыць”. (Г. Штыхаў) Тэкст 26. РАЗДЗЕЛ 1. АРТЫКУЛ 2. Мы, гаспадар, абяцаем нікога не караць па завочным абвінавачванні, хай бы гэта датычыла абражання маястату нашага гаспадарскага або здрады рэчы паспалітай. А хто б каго неабгрунтавана абвінаваціў па тых жа справах, аб абражанні маястату нашага гаспадарскага або здрадзе рэчы паспалітай, але не даказаў, тым самым павінен быць пакараны. Таксама пайменаваным прэлатам, княжатам, панам-радам духоўным і свецкім, панам харугоўным, шляхце і гарадам земляў Вялікага княства Літоўскага і ўсіх іншых земляў, якія здаўна і цяпер таму панству Вялікаму княству Літоўскаму належаць, абяцаем словам нашым гаспадарскім, што ні на якога чалавека не будзе пачата яўнае праследаванне, або следства, або тайнае падазрэнне, тых саслоўяў вышэй указаных, якім-небудзь пакараннем грашовым, крывавым, турэмным, або адабраннем чыноў, пасад або маёнткаў, абвінавачваць і караць не павінны і не будзем, перш чым на сойме ў судзе яўным у адпаведнасці з парадкам судавытворчасці і права, калі скаржнік, гэта значыць ісцец, і адказчык абвінавачаны асабіста паўстануць, і пераканаўча ў канцы будуць пераможаны на судзе, і пасля такога разгляду вінаватыя павінны быць пакараны карай, указанай у ніжэй апісаных артыкулах. А таксама калі б хто-небудзь узвёў паклёп на каго ў тых справах па абражанню маястату нашага або ў здрадзе рэчы паспалітай абвінаваціў, да ганьбы, а абвінавачанаму пагражала б страта гонару, або пазбаўленне жыцця, або іншае пакаранне, тады той, каторы каго абвінаваціў і абылгаў, а не дакажа абвінавачвання, павінен быць пакараны той самай карай. (Статут Вялікага Княства Літоўскага) Тэкст 27. РАЗДЗЕЛ 5. АРТЫКУЛ 9. Аб дзеўках, якія пасля смерці бацькоў без згоды братоў або сваіх стрыяў замуж поўдуць Устанаўліваем: калі б дзеўка засталася без бацькі і маці, а пасля смерці бацькоў сваіх, не даросшы сваіх гадоў, пайшла замуж без згоды братоў або стрыяў, а калі не будзе мець родных братоў або стрыяў, тады блізкіх сваіх або апекуноў, апісаных у праве або ўстаноўленых, такая траціць пасаг і маёнтак свой вотчынны і мацярынскі і спадчынны, што б і ў будучым да яе перайсці магло. А калі б яна мела гады свае, а браты або стрыі яе затрымлівалі і не хацелі б яе замуж выдаць, тады, аднак жа, самавольна не павінна ні за кога ісці, але павінна даць ведаць ураду праз сваякоў, або таксама і праз суседзяў, або і праз каго-небудзь. А ўрад, атрымаўшы аб тым пэўныя звесткі, што тыя блізкія, у якіх знаходзіцца ў апецы, замуж яе выдаваць не хочуць, павінен ёй дазволіць замуж пайсці, але за шляхціца, а не за простага стану чалавека. А яна калі са згоды ўрада або блізкіх пойдзе за шляхціца, тады такая маёнтка не павінна траціць, а гады дзеўка павінна мець поўныя – трынаццаць гадоў. А той, хто яе возьме, можна будзе яму сумесна з ёй патрабаваць маёмасці жонкі сваёй. Браты таксама або стрыі і якія-небудзь блізкія, маючы сясцёр у апецы сваёй, пакуль іх замуж выдадуць, павінны іх прыстойна ва ўсім утрымліваць, маючы жанчыну пры іх старую паважную. А калі б прыстойна ўтрымліваць не хацелі, тады такія дзеўкі могуць на частцы сваёй, з якой ім пасаг быць павінен, самі сядзець і пад апекай апекуна, ад урада ім прызначанага, да таго часу, пакуль замуж пойдуць. А ідучы замуж, пасаг ім з таго павінен быць дадзены паводле статута, вышэй апісанага. (Статут Вялікага Княства Літоўскага) Тэкст 28. Самая прыгожая жанчына Аднойчы два маракі адправіліся ў падарожжа па свеце, каб знайсці свой лёс. Прыплылі яны на востраў, дзе ў правадыра аднаго з плямёнаў было дзве дачкі. Старэйшая – прыгажуня, а малодшая – не вельмі. Адзін з маракоў сказаў свайму сябру: – Усё, я знайшоў сваё шчасце, застаюся тут і ажанюся з дачкой правадыра. – Так, ты маеш рацыю, старэйшая дачка правадыра прыгажуня, разумніца. Ты зрабіў правільны выбар – жаніся. – Ты мяне не зразумеў, сябар! Я ажанюся з малодшай дачкой. – Ты што, з глузду з'ехаў? Яна ж такая… не вельмі. – Гэта маё рашэнне, і я гэта зраблю. Сябар паплыў далей у пошуках свайго шчасця, а жаніх пайшоў сватацца. Трэба сказаць, што ў племені было прынята даваць за нявесту выкуп каровамі. Добрая нявеста каштавала дзесяць кароў. Прыгнаў ён дзесяць кароў і падышоў да правадыра. – Правадыр, я жадаю ажаніцца з тваёй дачкой і даю за яе дзесяць кароў! – Гэта добры выбар. Мая старэйшая дачка прыгажуня, разумніца, і яна вартая дзесяці кароў. Я згодны. – Не, ты не зразумеў. Я жадаю ажаніцца з тваёй малодшай дачкой. – Ты што, жартуеш? Не бачыш, яна ж такая… не вельмі. – Я жадаю ў жонкі толькі яе. – Добра, але як сумленны чалавек я не магу ўзяць дзесяць кароў, яна таго не вартая. Я вазьму за яе тры каровы, не больш. – Не, я жадаю заплаціць менавіта дзесяць кароў. Яны ажаніліся. Прайшло некалькі гадоў, і сябар-вандроўнік, ужо на сваім караблі, вырашыў наведаць пакінутага таварыша і даведацца, як той жыве. Прыплыў, ідзе па беразе, а насустрач яму жанчына незямной прыгажосці. Ён у яе спытаў, як знайсці свайго сябра. Яна паказала. Прыходзіць і бачыць: сядзіць яго сябар, вакол дзеці бегаюць. – Як жывеш? – Я шчаслівы. Тут уваходзіць тая самая прыгожая жанчына. – Вось, пазнаёмся. Гэта мая жонка. – Як? Ты што ажаніўся яшчэ раз? – Не, гэта ўсё тая ж жанчына. – Але як гэта адбылося, што яна так змянілася? – А ты спытай у яе сам. Падышоў сябар да жанчыны і пытае: – Прабач за бестактоўнасць, але я памятаю, якой ты была… не вельмі. Што адбылося, што ты стала такой прыгожай? – Проста, аднойчы я зразумела, што каштую дзесяці кароў. Прытча. |